Pitutur Mangda Madue Kapracayaan sane Kukuh
12
Nah, sane mangkin akeh anake pracaya punika sampun dados saksi buat iraga, lan kasaksian ipune sekadi ambu sane ngiterin iraga. Punika mawinan, ngiring ja iraga ngutang sekancan paindikan sane abot lan dosa sane dados pialang buat iraga. Ngiring ja iraga pageh mautsaha mangda sida malomba krana paindikane punika wenten ring arepan iragane kantos dina pamuput. 2 Ngiring ja iraga setata nyingak ring Sang Hyang Yesus, krana Ida sane ngaryanin tur nyaga kapracayaan iragane. Ida kukuh nanggung sengsara ring kayu salibe. Tur Ida nenten rungu ring rasa kimud ritatkala kapademang ring kayu salibe yadiastun paindikane punika nganistayang Ida. Krana Ida nyingak bagia sane jagi rasayang Ida riwekasan. Sane mangkin Ida malinggih ring kenawan singasanan Sang Hyang Pengardi. 3 Pinehang ja indik Sang Hyang Yesus sane nanggung kasengsaran sekadi punika krana kalawan olih anak madosa. Krana yening iraga nulad Ida, iraga nenten madue manah lemet lan nenten nyerah. 4 Krana utsahan iragane nglawan dosa dereng taen kantos ngetelin getih. 5 Turmaning sampunang ja lali kapining pitutur Sang Hyang Pengardine sane kapicayang ring ragane sane dados putra lan putrin Idane sekadi puniki,“Duh cening, eda ja kadena ingan ritatkala Nira ngorahin cening,
lan eda ja nyerah ritatkala Nira nguelin cening.
6 Krana Nira ngorahin anake ane tresnain Nira.
Tur Nira ngukum makejang anake ane kadadiang putran Nirane.” Pitutur 3:11-12
7 Nah sane mangkin ragane nerima kasengsaran ritatkala Ida ngorahin ragane sekadi ragane orahina kapining bapan ragane. Wentenke bapa sane nenten taen nguelin pianaknyane? 8 Yening ragane nenten taen orahina olih Sang Hyang Pengardi sekadi makasami anake sane lianan, artine ragane nenten ja putra lan putrin Idane sane sah. 9 Ngiring ja pinehang, punapike para bapan iragane ring jagate puniki? Ipun ngorahin iraga tur iraga subakti kapining ipun. Napi malih Ajin iragane ring swarga, sapatutne iraga ngendepang raga kapining Ida mangda iraga maurip. 10 Para bapa ring jagate puniki ngorahin iraga tuah ajebos kamanten. Tur pitutur ipune punika becik manut manahnyane praragan. Nanging Sang Hyang Pengardi ngorahin iraga antuk paindikan becik sane maguna buat iraga, mangdane iraga dados anak sane suci sekadi Ida. 11 Yakti pisan ritatkala iraga orahina, iraga marasa sebet tur nenten ja seneng. Nanging sasampune kenten, pituture punika ngranayang iraga maurip sane patut lan ngrasayang dame.
12 Sane mangkin, kukuhang ja tangan ragane sane lemet lan entud ragane sane ngejer punika mangda prasida malomba kantos dina pamuput. 13 Tur mamargi ja ring margine sane asaha, mangdane batis ragane sane perot nenten kajengklok, sakewala dados seger.
14 Utsahayang ja mangdane ragane maurip dame sareng anak lianan. Lan utsahayang ja mangda ragane maurip suci. Krana yening ragane nenten suci, ragane nenten mresidayang nyingakin Sang Ratu Agung. 15 Waspada ja mangda nenten wenten saking ragane sami sane ical saking wara nugraha Sang Hyang Pengardi. Tur waspada ja mangda nenten tumbuh papineh sane pait sekadi punyan kayu sane maracun. Krana papineh sane pait punika ngranayang uyut tur ngranayang akeh anake dados cemer. 16 Waspada ja mangda nenten wenten anak sane dados cabul, utawi anak sane nenten ngajiang paindikan rohani sekadi dane Esau. Dane nenten subakti kapining Sang Hyang Pengardi tatkala dane nyilurin pica dados putra utama antuk ajengan apiring. 17 Sasampune kenten ragane uning, dane Esau meled kamertanin olih ajin danene, nanging dane nenten katerima. Raris dane nangis mepangenan nunas mangda kamertanin, nanging dane nenten sida majumu malih buat menahin kaiwangan danene.
Prajanjian Lawas Bandingang Kapining Prajanjian Anyar
18 Ragane nenten ja sekadi anak Yahudine idumun sane rauh ka Gunung Sinai sane sida kausud mangda nerima prajanjian lawas. Irika wenten geni sane ngendih, wenten gulem tur peteng dedet, turmaning wenten angin linus. 19 Kenten pada wenten suaran sompret sane ageng lan suaran Sang Hyang Pengardine. Duk ipun sami mirengin suarane punika, para leluhur iragane pada jejeh tur nunas mangda nenten malih mirengin suarane punika. 20 Krana ipun nenten sanggup nerima prentah sekadi puniki, “Nyen ja ane ngusud gununge ene, nyake manusa wiadin beburon, musti katimpug aji batu kanti mati.” Pararudan 19:12-13 21 Nyaksiang paindikane punika yakti nyejehin pisan kantos dane Musa mabaos sapuniki, “Titiang jejeh pisan kantos ngejer.” Pengeling-eling 9:9
22 Nanging ragane sida kaumpamiang sampun rauh ring Bukit Sion malantaran prajanjian anyar. Tur ragane sampun rauh ring kota druen Sang Hyang Pengardine sane urip, inggih punika Yerusalem sane ring swarga. Kenten pada, ragane rauh sid para malekate sane akehne nenten sida antuk metek. 23 Ragane sampun rauh ring soroh para krama druen Sang Hyang Kristus, inggih punika ipun sami sane kaucap para putra lan putri kapertama Sang Hyang Pengardine. Pesengan sebilang diri anake punika sampun kacatet ring swarga. Ragane sampun rauh ring Sang Hyang Pengardi, inggih punika Akim buat anake sami. Ragane sampun rauh ring jiwatman anake sane patut, inggih punika anake sane kadadosang sempurna. 24 Ragane sampun rauh ring Sang Hyang Yesus, inggih punika Ida sane dados titi prajanjian anyar punika. Turmaning ragane sampun rauh ring rah Ida sane kaketisin. Rah Idane punika ngicen janji sane becik, becikan kapining rah dane Habel.
25 Waspada ja ragane mangdane nenten nulak Ida sane masabda punika. Idumun, leluhur iragane nulak sabdan Sang Hyang Pengardi sane kaortiang ring jagate puniki olih dane Musa. Tur ipun nenten luput saking ukuman Sang Hyang Pengardi. Napi malih iraga yening iraga nenten rungu ritatkala iraga kanikain olih Ida sane ring swarga; pastika iraga pada nenten luput saking ukuman. 26 Duk idumun, ritatkala Ida masabda kapining dane Musa, jagate magejeran. Nanging mangkin Ida sampun majanji sapuniki, “Buin acepok Nira bakal ngejerang gumine: tusing ja gumine dogen, nanging langite pada.” Hagai 2:6 27 Duk Ida ngandika “Buin acepok,” artine ngilis pisan makasami sane sampun kaciptayang jagi kagejerang tur kakutang. Mangdane sane kari wenten, inggih punika paindikan sane nenten prasida kagejerang.
28 Sane mangkin, krana iraga nerima karajaan sane nenten prasida kagejerang, sapatutne iraga ngaturang suksma ring Sang Hyang Pengardi. Tur ngiring ja iraga nyembah Ida manut napi sane nyenengin Ida. Iraga nyembah Ida antuk manah sane subakti lan jejeh. 29 Krana “Sang Hyang Pengardi sekadi geni sane prasida muunang.” Pengeling-eling 4:24